Fjölsótt námskeið fyrir jafningja

Fjöldi manns á vegum Sorgarmiðstöðvar sóttu jafningjanámskeið hjá Krabbameinsfélaginu nú á dögunum. Námskeiðinu er ætlað að efla jafningjaþjónustu Sorgarmiðstöðvar. Jafningjaþjónustan snýr að því að bjóða einstaklingum sem hafa misst ástvin upp á stuðning í formi samtals við jafningja. Þau sem veita jafningjastuðning hjá Sorgarmiðstöð eru einstaklingar sem misst hafa náinn ástvin, náð að vinna vel úr sínum missi og hafa fengið viðeigandi þjálfun. Þjálfun jafningja Sorgarmiðstöðvar felur í sér að sitja tvö námskeið. Annars vegar námskeið um sorg og sorgarviðbrögð og hinsvegar námskeið sérstaklega ætlað þeim sem styðja syrgjendur. Síðarnefnda námskeiðið byggir á hugmyndafræði Krafts og Krabbameinsfélagsins um Stuðningsnetið sem er fyrir krabbameinsgreinda og aðstandendur þeirra. Þau sem eru í jafningjahópi Sorgarmiðstöðvar vinna eftir siðareglum félagsins og skrifa undir trúnaðaryfirlýsingu en öll samtöl við syrgjendur eru trúnaðarmál.

Krabbameinsfélagið gaf Sorgarmiðstöð námskeiðið og færum við þeim bestu þakkir fyrir.

Við erum einnig gríðarlega þakklát öllum þeim jafningjum sem hafa skráð sig og sem að gefa af sér í þetta verkefni.

Hægt er að sækja um jafningjastuðning hér