Heiðursbollinn afhentur í fjórða sinn

Á aðalfundi Sorgarmiðstöðvar þann 29. apríl var Heiðursbollinn afhentur í fjórða sinn. Heiðursbollinn er ætlaður sem viðurkenning til þeirra sem hafa lagt sitt af mörkum í þágu syrgjenda á Íslandi.

Að þessu sinni hlutu Ína Lóa Sigurðardóttir, fyrrum framkvæmdastjóri Sorgarmiðstöðvar og Hulda Guðmundsdóttir, fyrsti formaður Sorgarmiðstöðvar heiðursbolla en báðar komu þær að stofnun Sorgarmiðstöðvar árið 2019.

Ína Lóa hefur unnið að velferð syrgjenda í mörg ár. Hún stofnaði samtökin Ljónshjarta og var þar formaður fyrstu sex árin. Ína kom að stofnun Sorgarmiðstöðvar og var í fyrstu stjórn hennar. Hún er einnig annar hugmyndasmiða sjónvarpsþáttana MISSIR sem sýndir voru á Sjónvarpi Símans. Ína starfaði lengi sem framkvæmdastjóri Sorgarmiðstöðvar þar til hún ákvað að fara í ný verkefni um áramótin. Þar að auki sinnti Ína Lóa stuðningshópastarfi fyrir makamissi og stuðningshópastarfi fyrir þau sem missa barn á meðgöngu.

Hulda Guðmundsdóttir var um árabil formaður Nýrrar dögunar og var meðal hvatamanna að stofnun Sorgarmiðstöðvar og var fyrsti formaðurinn. Hulda var einnig lengi vel gjaldkeri Sorgarmiðstöðvar.
Þar að auki var Hulda hópstjóri í stuðningshópastarfi fyrir einstaklinga sem hafa misst maka.

Sorgarmiðstöð á margt að þakka þessum tveimur frumkvöðlum sem hafa í gegnum árin byggt upp faglegt og gott starf sem mun nýtast syrgjendum um ókomin ár.

Heiðursbollinn er unnin af Kristínu Sigfríði Garðarsdóttur keramikhönnuði.

Kærar þakkir einnig til Burkna fyrir fallega blómvendi handa heiðurshöfum.