Starfshópur afhenti tillögur að aðgerðaráætlun til að fækka sjálfsvígum á Íslandi

Undanfarna mánuði hefur starfshópur sem skipaður var af fyrrum heilbrigðisráðherra, Willum Þór Þórssyni, unnið tillögur að nýrri aðgerðaáætlun til að fækka sjálfsvígum á Íslandi, fyrir árin 2025 – 2030. Þann 21. janúar skilaði starfshópurinn tillögu sinni að nýrri aðgerðaáætlun til Ölmu D. Möller heilbrigðisráðherra.

Jóhanna María Eyjólfsdóttir, fagstjóri Sorgarmiðstöðvar, var hluti af starfshópnum en með henni voru þau Guðrún Jóna Guðlaugsdóttir, verkefnastjóri hjá Lífsbrú og fyrrum fagstjóri Sorgarmiðstöðvar, Ásta Ingibjörg Pétursdóttir, prestur í Langholtskirkju, Guðríður Haraldsdóttir, sálfræðingur hjá Geðheilsumiðstöð barna, Grétar Björnsson, félagsfræðingur fyrir hönd Hugarafls og Geðráðs, Ingibjörg Sveinsdóttir, sálfræðingur og sérfræðingur í heilbrigðisráðuneytinu, Liv Anna Gunnell, fagstjóri sálfræðiþjónustu hjá Þróunarmiðstöð íslenskrar heilsugæslu, Sigrún Sigurðardóttir, prófessor við Háskólann á Akureyri, Sigurður Páll Pálsson, læknir á geðsviði Landspítala og Tómas Kristjánsson, sálfræðingur fyrir hönd Píeta samtakanna.

Á fundi sem haldinn var af tilefninu ræddu heilbrigðisráðherra, fulltrúar ráðuneytisins og starfshópurinn um innleiðingu aðgerðaáætlunarinnar, samráð, kynningu og fjármögnun. Áætlað er að aðgerðirnar verði unnar í samstarfi við ráðuneyti, stofnanir og félagasamtök. Í áætluninni eru 26 aðgerðir sem snúa að öllum stigum sjálfsvígsforvarna; forvörnum, íhlutunum og stuðningi eftir sjálfsvíg.

Nánar er hægt að lesa um aðgerðaráætlunina hér.