Aukin réttur til sorgarleyfis samþykktur

Alþingi samþykkti á dögunum frumvarp um breytingar á lögum um sorgarleyfi. Lögin fela í sér aukinn rétt foreldra til sorgarleyfis sem styrkir enn frekar stöðu barna og barnafjölskyldna sem verða fyrir áföllum.

Sorgarleyfi er lagalegur réttur foreldra til að fá leyfi frá störfum í kjölfar barnsmissis í sex mánuði og greiðslur til að koma til móts við tekjutap á meðan. Árið 2023 voru lög um sorgarleyfi fyrir foreldra sem missa barn undir 18 ára samþykkt en með nýju lögunum nær sorgarleyfi einnig til foreldra sem missa maka og eiga börn yngri en 18 ára.

Víðtæk samstaða var um lagabreytingarnar í umsögnum um frumvarpið. Þau voru til að mynda talin mikil réttarbót og mikilvægt skref í átt að betri félagslegum stuðningi fyrir þá sem missa nákomna. 

Lögin fela einnig í sér lengra sorgarleyfi í ákveðnum tilfellum. Á foreldri nú sjálfstæðan rétt til sorgarleyfis eða sorgarstyrks í allt að þrjá mánuði frá þeim degi sem fósturlát eftir 18 vikna meðgöngu á sér stað. Áður var tímabilið tveir mánuðir. Einnig hefur foreldri sem hefur verið í samfelldu starfi nú sjálfstæðan rétt á sorgarleyfi eða sorgarstyrk í allt að sex mánuði frá þeim degi sem andvanafæðing á sér stað eftir 22 vikna meðgöngu. Áður var tímabilið þrír mánuðir.

Svigrúmið sem sorgarleyfið gefur af sér er forsenda þess að fjölskyldur geti leitað viðeigandi úrræða sem stuðla að farsælli endurkomu foreldra á vinnumarkað og gefur þeim einnig aukið færi á aðstoða börn við að taka aftur virkan þátt í daglegu lífi og samfélagi eftir áföll.

Hægt er að lesa nánar um sorgarleyfi hér