Karlmenn og sorg

Kvöldið var tileinkað karlmönnum í sorg þar sem markmiðið var að skapa öruggt rými með áherslu á samveru, samstöðu og minna á að enginn þarf að bera sorg eða erfiðleika einn. Viðburðurinn var sá fyrsti í röð viðburða á vegum Sorgarmiðstöðvarinnar sem ætlað er að efla stuðning og samfélag fyrir karla í sorg.

Hrannar Már var fundarstjóri en hann hefur komið að aðstoð fólks í sorg í um 15 ár. Hann leitaði sjálfur sér hjálpar eftir að hafa misst dóttur sína, Emblu Rut. Hrannar hefur víðtæka reynslu af stuðningi við syrgjendur, meðal annars foreldra sem misst hafa barn, stofnaði og stýrði starfi fyrir þau sem misst hafa ástvini vegna fíknar og hefur starfað sem sjálfboðaliði hjá Erninum við að styðja börn og unglinga í sorg.

Þeir Sigurjón Þórðarson, Arnar Sveinn Geirsson og Stefán Þór deildu sinni ólíku reynslu af missi og úrvinnslu sorgar. Frásagnir þeirra voru einlægar, áhrifamiklar og veittu vonandi þátttakendum bæði innsýn og von.

Sorgarmiðstöð vill þakka skipuleggjendum kærlega fyrir að sýna frumkvæði og leggja sitt af mörkum til að skapa mikilvægan vettvang fyrir karla í sorg. Einnig færum við öllum þeim sem mættu innilegar þakkir fyrir þátttökuna, hlýjuna og stuðninginn sem einkenndi kvöldið. Ljóst er að þörfin fyrir slíka samveru er mikil og hlökkum við til að halda áfram að byggja upp þetta mikilvæga starf á komandi misserum.