Erlent samstarf

Einn líður í því að starfsemi Sorgarmiðstöðvar geti haldið áfram að vaxa og dafna er að taka þátt í erlendu samstarfi.

Í byrjun mars átti fagstjóri Sorgarmiðstöðvar, Jóhanna María Eyjólfsdóttir, afar upplýsandi og árangursríkan fund í Heilbrigðisráðuneyti Tékklands í Prag. Hann var haldinn í tilefni af komu fagstjórans á kvikmyndahátíð þar sem heimildarmyndin ÚT ÚR MYRKRINU, sem fjallar um eftirlifendur í kjölfar ástvinamissis úr sjálfsvígi, var sýnd í tilefni af geðræktarviku.

Að sögn fagstjóra voru allir helstu aðilar sem starfa í sorgarstuðningi og málefnum þeim tengdum boðaðir til fundarins í ráðuneytinu og málefni syrgjenda aðalumræðuefni hans.

Fundarmenn lýstu miklum áhuga á starfsemi Sorgarmiðstöðvar en stuðningur við syrgjendur er mun skemmra á veg komin í Tékklandi og að mestu leyti í höndum sjálfstætt starfandi fagaðila eða fámennra félagasamtaka. Niðurstaða fundarins var meðal annars sú að fundarmenn lýstu áhuga sínum yfir að kynna sér starfsemi Sorgarmiðstöðvar enn betur í þeim tilgangi meðal annars að taka upp svipað verklag og Sorgarmiðstöð hefur notað í stuðningshópastarfi sínu. Ennfremur var mikill hugur í fólki að setja á laggirnar í Tékklandi miðstöð í líkingu við Sorgarmiðstöð og að öllum líkindum markar fundurinn upphafið að frekara samstarfi.