Hópastarf

Stuðningshópar í sorgarúrvinnslu eru ekki meðferð við sorg, en þeir geta bætt líðan þess sem syrgir og hafa þannig meðferðarlegt gildi. Markmiðið með hópastarfinu er að gefa syrgjendum rými og vettvang til að tjá líðan sína og veita þeim innsýn og skilning á margvíslegum birtingarmyndum sorgarferilsins. Þegar fólk kynnist, sem á það sameiginlegt að hafa misst ástvin, skapast oft dýrmæt samkennd og traust þar sem þátttakendur fá tækifæri til að þiggja stuðning og miðla eigin reynslu.

Það er algengur misskilningur að í sorgarhópum sé fólk „að velta sér uppúr sorginni”. Verkefnið er að finna sorginni stað í hjartanu – til að geta haldið áfram að lifa. Það myndast oft hlý vináttutengsl í hópnum og þar er líka hlegið því húmorinn er afar mikilvægur og hjálplegur í sorginni.

Í hverjum hópi eru um tíu manns sem hittast vikulega í sex vikur. Tveir fagaðilar halda utan um hvern hóp. Nauðsynlegt er að skrá sig í hópastarf til að tryggja þátttöku. 

Almennt er talið heppilegt að sex mánuðir líði frá andláti ástvinar þangað til þér gagnast að taka þátt í stuðningshópi – en þetta er ekki algilt.

 

ATH: Það kostar ekkert að koma í hópastarf og það er alltaf hægt að skrá sig. Í flestum tilfellum erum við með hópastarf fyrir alla hópa einu sinni til tvisvar á ári.
 
Ef við náum ekki lágmarksþátttöku í viðkomandi hópastarf verður hópastarfinu frestað.